1392. August 29. Czarnowanz

In Nomine Domini Amen. Sub Anno Nativitatis eiusdem M°. Trecentesimo Nonagesimo secundo, Indicione quintadecima, die mensis Augusti vicesima nona, hora vesperorum vel quasi, Pontificatus sanctissimi in Cristo patris ac domini nostri domini Bonifacii digna dei providencia pape noni Anno tercio, In Capitulo Monasterii sanctimonialium in Czarnowans alias Domus dei Wratislauiensis diocesis In mei notarii publici subscripti testiumque subscriptorum ad hoc vocatorum et rogatorum presencia Constitute honorabiles et religiose virgines Phylomena Priorissa, Gerdrudis Circatrix, Clara Celleraria, Anna Cantrix et alie plures ibidem existentes sub fidei ipsarum puritate ad requisicionem Religiosi viri fratris Nicolai provisoris ipsarum Quandam relacionem recognoverunt se habuisse cum Religioso viro domino Petro Krumphus Sub Anno domini M°. ccc°. Nonagesimo in adventu domini sub hora vesperorum vel quasi in stuba habitacionis honeste et religiose virginis Clare dicte Cellerarie eiusdem Monasterii in Czarnowans super quodam contractu debitorum in et de ecclesia dicti fratris Nicolai in Opataw factorum, per quem contractum talium debitorum prout eis insonuit a relacione quorundam dicentes se formidare de eius procuracione, ne talia debita sua de ipsarum pecuniis in posterum solveret et pagaret, per quam solucionem possent inire dampnum non modicum et gravamen. Qui dominus Petrus antedictus non coactus non petitus neque per aliquem errorem seductus, sed bona deliberacione dixit ex proprio motu sui animi dictis virginibus: Dilecte virgines, non dubitetis in eodem domino Nicolao neque formidare debeatis, quia dico vobis pro certo quod nullum debitum magis contraxit in sua ecclesia et extra nisi tantum in sex marcis pro quibus ego sum obligatus et solvere promisi pro eodem Iuxta amicabilem concordiam inter nos ambos factam per Reverendum in Cristo patrem ac dominum dominum Franciscum Abbatem nostrum et regracior eidem domino Nicolao quod omnia bona michi dimisit sua in ecclesia, de quibus bonis debita per ipsum ut predicitur contracta solvere bene possum vestra sine offensione. Super quibus omnibus premissis prefatus dominus Nicolaus a me notario publico infrascripto sibi confici peciit hoc publicum Instrumentum. Acta sunt hec Anno Indicione die mense hora loco et pontificat. quibus supra Presentibus discretis viris dominis Nicolao de Nikelin, Wenceslao de Brenicia Cappellanis, Martino sanctuario Monasterii in Czarnowans testibus ad premissa vocatis specialiter et rogatis.
Signum Notarii.
Et ego Nicolaus quondam Johannis Hart clericus Wratislauiensis Imperiali auctoritate notarius predicte recognicioni omnibusque aliis et singulis premissis dum sic ut premittitur fierent et agerentur una cum prenominatis testibus presens interfui eaque omnia et singula sic fieri vidi et audivi et in hanc publicam formam redegi, signo et nomine meis solitis et conswetis consignavi rogatus et requisitus in fidem et testimonium omnium Premissorum.

Aus dem Archive von S. Vincenz.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.